Verskoning

Goeienaand my naam is Piet
‘n kind van die straat
waar elkeen my ken
vanweë my kattekwaad

Ek vra om verskoning
ek weet ek doen julle verdriet
as ek met my kleine kettie
klippies na julle katte skiet

Maar ek wil julle vertel
van my eie kleintyd
dit was nie altyd maklik nie
daar was dikwels swarigheid

Want my vader sonder werk
hou meer van drank
as van Moeder en my
sy sit dikwels op die bank

en kyk dan heeldag sepies
maar ek vra verskoning hierdie dag
want ek is regtig jammer
vir my slegte gedrag

Ek sal van nou af skool toe gaan
en met skryf en lees
elke dag my bes doen
sodat ek eendag ‘n engel kan wees

Koester Afrikaans

Afrikaans die taal
wat ons skryf, lees
en wat ons praat
hoe arm sal ons wees
sonder haar woordeskat?
Koester darem Afrikaans

Die tuinfeetjie

Wie kan jy skaars sien
want sy is so klein?
Dis die feetjie in my tuin
wat skielik verskyn

om in die reënboë
wat die sonlig toor
in pêrels van dou
tussen bont blomme
in die gras te dans
om jou te bekoor

Verleentheid

Tale bemeester hy: amper vyf
waarin hy kan praat, lees en skryf
maar in die nabyheid van ‘n mooie vrou
vergeet hy al sy liewe woorde gou
want deur sy verleentheid gaan sit in sy lyf

My regte kombinasie

Vir my is die regte kombinasie
die geur van vars koffie
met karringmelkbeskuit, so een tot drie
en heelwat Afrikaanse poësie

My liedjie vir haar

‘n  E, A, D, G, B en nog ‘n E snaar
sit daarop my kleine kitaar
hiermee speel ek my melodietjie
en sing ek met graagte my liedjie
in die maanlig alleen vir haar